Захаров Андрей Иванович
| Андрей Иванович Захаров | |
|---|---|
| Билэ:Zaharov.png | |
|
| |
|
Саха АССР Үрдүкү Сэбиэтин бэрэссэдээтэлэ
|
|
| 1947 — 1951 | |
|
|
|
| Төрөөбүт күнэ |
1912 сыл атырдьах ыйын 18 күнэ |
| Өлбүт күнэ | 1997 сыл ахсынньы 29 күнэ (85 сааһыгар) |
| Баартыйата | КПСС |
| Наҕараадалара |
 |
Андрей Иванович Захаров (1912 сыл атырдьах ыйын 18 күнэ, Арҕаа Хаҥалас улууһа, Саха уобалаһа — 1997 сыл ахсынньы 29 күнэ) — сэбиэскэй судаарыстыбаннай уонна баартыйа диэйэтэлэ, Саха АССР Үрдүкү Сэбиэтин бэрэссэдээтэлэ.
Олоҕун олуктара
1912 сыллаахха атырдьах ыйын 18 күнүгэр Арҕаа Хаҥалас улууһун (билиҥҥи Хаҥалас улууһа) Нөмүгү нэһилиэгэр дьадаҥы бааһынай дьиэ кэргэнигэр төрөөбүтэ. Аҕата аҕыс саастааҕар өлбүтэ.
1928 сыллаахха Өктөм сэттэ кылаастаах оскуолатын бүтэрбитэ уонна хомсомуолга киирбитэ. Улууска сир реформатын ыытыыга уонна бастакы холкуостары тэрийиигэ кыттыбыта.
1930—1937 сыллардаахха пионердар тэрилтэлэрин бюротун бэрэссэдээтэлинэн, онтон Арҕаа Хаҥаластааҕы хомсомуол райкомугар сэкирэтээринэн үлэлээбитэ. Ол кэннэ хомсомуол обкомугар эппиэтинэстээх үлэҕэ көспүтэ.
1937 сыл ыам ыйыгар ВКП(б) кэккэтигэр киирбитэ. 1937—1939 сыллардаахха Москваҕа ВКП(б) КК иһинэн баартыйа пропагандиһын үрдүкү куурустарыгар үөрэммитэ. Үөрэҕин бүтэрэн, 15 сыл устата баартыйа обкомун эппиэтинэстээх үлэлэрин толорбута: устурууктар, сиэктэр сэбиэдиссэйэ, каадыр салаатын сэбиэдиссэйин солбуйааччыта, тыа хаһаайыстыбатын салаатын сэбиэдиссэйэ, ССКБ обкомун сэкирэтээрэ. Бу сылларга ССКП КК иһинэн баартыйа Үрдүкү оскуолатын бүтэрбитэ.
1943 сыл ахсынньытыттан 1947 сыл атырдьах ыйыгар диэри ВКП(б) Саха Сиринээҕи обкомун пропагандаҕа уонна агитацияҕа сэкирэтээринэн үлэлээбитэ. 1947—1951 сылларга Саха АССР Үрдүкү Сэбиэтин бэрэссэдээтэлин дуоһунаһын толорбута. 1951 сыллаахха партия обкомун сэкирэтээринэн хаттаан талыллыбыта.
Өрөспүүбүлүкэни салайар кэмигэр Ыһыаҕы өрөспүүбүлүкэ үрдүнэн национальнай бырааһынньык быһыытынан ыытыыны чөлүгэр түһэриинэн дьарыктаммыта. Арассыыйа үрдүк үөрэхтэригэр өрөспүүбүлүкэҕэ сыаллаах миэстэлэр көрүллэллэрин хааччыйбыта, киин эрэгийиэннэртэн идэтийбит исписэлиистэри Саха сиригэр ыытыыны тэрийбитэ.
1961 сылга диэри ССРС БА Саха Сиринээҕи филиалын тыл, литература уонна устуоруйа билим-чинчийэр институтун үлэһитинэн, салалта начаалынньыгынан, онтон өрөспүүбүлүкэ тыа хаһаайыстыбатын миниистирин бастакы солбуйааччытынан үлэлээбитэ.
РСФСР Үрдүкү Сэбиэтин 2-с уонна 3-с ыҥырыыларын дьокутаатынан, онтон Саха АССР Үрдүкү Сэбиэтин дьокутаатынан хаста да талыллыбыта.
Пенсияҕа тахсан баран, 1985 сылга диэри киин куораттарга олоро сылдьыбыта. 1997 сыл ахсынньы 29 күнүгэр өлбүтэ[1].
Наҕараадалара уонна ытык ааттара
- Үлэ Кыһыл Знамятын уордьана;
- «Бочуот Бэлиэтэ» уордьан;
- Хаҥалас улууһун Ытык олохтооҕо[1].
Быһаарыылар
- ↑ 1,0 1,1 [Захаров) Андрей Иванович. Хангаласская МЦБС. Сигэнии күнэ: 17 Бэс ыйын 2026.