Еремисов Михаил Николаевич
| Еремисов Михаил Николаевич | |
|---|---|
| Тус информация | |
| эр киһи | |
| Идэтийиитэ | сүүрүү |
| Төрөөбүт күнэ | 1961 |
| Төрөөбүт сирэ | |
Михаил Николаевич Еремисов (1961, Үөһээ Бүлүү улууһа, Саха АССР) — уһун дистанцияларга сүүрэр спортсмен, чэпчэки атлетика тренерэ, Арассыыйа норуоттар икки ардыларынааҕы кылаастаах успуордун маастара[1].
Олоҕун олуктара
1961 сыллаахха Үөһээ Бүлүү улууһун Далыр сэлиэнньэтигэр төрөөбүтэ. 1977 сыллаахха Далыр орто оскуолатын бүтэрбитэ. Армияҕа сулууспалаабытын кэннэ 1982 сыллаахха Красноярскайдааҕы үөрэх кыһатыгар физическэй иитиигэ үөрэнэ киирбитэ[1].
1986 сыллаахха үөрэҕин бүтэрэн, Далыр орто оскуолатыгар физкультура учууталынан үлэлээбитэ. 1987 сылтан Үөһээ Бүлүү оҕо спортивнай оскуолатын Далырдааҕы салаатыгар чэпчэки атлетика тренеринэн үлэлээбитэ. 1994 сыллаахха Үөһээ Бүлүүгэ көспүтэ. 2010 сыллаахха өлбүтэ[1].
Успуорка ситиһиилэрэ
1989 сыллаахха Үөһээ Бэстээх — Дьокуускай 100 километрдаах сүүрүүтүгэр бастаабыта. 1991 сыллаахха Гродноҕа 100 километрга Бүтүн Сойуустааҕы күрэхтэһиигэ кыайбыта[1].
1994 сыллаахха Подольскайга Арассыыйа кубогар биир суукка иһигэр 264 километр 400 миэтэрэни сүүрэн, норуоттар икки ардыларынааҕы кылаастаах успуорт маастарын аатын ылбыта. 1995–1998 сылларга Арассыыйа хамаандатыгар киирбитэ. 1997 сыллаахха Подольскайга Арассыыйа кыһыҥҥы чемпионатыгар сууккалаах сүүрүүгэ 234 километр 800 миэтэр түмүктээх иккис миэстэни ылбыта[1].